కంప్యూటర్‌‌లో తెలిసిపోతుంది.. ఇక అడ్డదారిలో డ్రైవింగ్ లైసెన్స్ కష్టమే

గ్రేటర్ హైదరాబాద్ పరిధిలో డ్రైవింగ్ లైసెన్స్ ప్రక్రియను ఆర్టీఏ కట్టుదిట్టం చేయనుంది. దీంతో ఇక నుంచి డ్రైవింగ్ టెస్టు ప్రక్రియ కంప్యూటర్‌‌లో రికార్డు కానుంది. డ్రైవింగ్ సరిగా చేయకపోతే కంప్యూటరే రిజెక్ట్ చేస్తుంది. అధికారులను మ్యానేజ్ చేసే అవకాశం ఉండదు. ఫెయిలైతే నెల తర్వాత టెస్టుకు రావాల్సి ఉంటుంది. లైసెన్స్ కోసం దరఖాస్తు చేసుకున్న వాళ్లు తప్పని సరిగా పరీక్ష రాయాల్సిందే. ట్రాక్ మీద వాహనం నడిపిన తర్వాతే లైసెన్స్ పొందుతారు. వాహనం నడిపినప్పుడు కంప్యూటర్ లో అంతా రికార్డు అవుతుంది .. ఏ మాత్రం తప్పు చేసిన ఇట్టే తెలిసిపోతుంది ఒకవేళ ఈ టెస్టులో ఫెయిల్ అయితే మళ్లీ నెల తరువాత టెస్టుకు రావాల్సి ఉంటుంది.

కొత్తగా ఆర్టీఏ అమలు చేయబోయే ఆటోమేటిక్ డ్రైవింగ్ టెస్ట్లో 5 ట్రాక్లు ఏర్పాటు చేస్తారు. ముందుగా H ట్రాక్‌లో ఆర్టీఏ ప్రమాణాల్లో పేర్కొన్న విధంగా వాహనాన్ని రివర్స్ చేయాల్సి ఉంటుంది. ఆ తర్వాత S అనే ట్రాక్‌లో ఒక మూల నుంచి మరో మూలకు వెహికల్ను టర్న్ చేయాలి. అలాగే K అనే ట్రాక్‌లో బాగా మలుపులు, ఎత్తుపల్లాలు, ఎత్తయిన ప్రదేశాలు, చిన్న లోయలు వంటి ప్రాంతాల్లో ఏర్పాటు చేస్తారు. ఆ ట్రాక్‌లో వాహనాన్ని నడిపి.. చివరగా బండిని పార్కింగ్ చేసి చూపించాల్సి ఉంటుంది.

అయితే ట్రాఫిక్ నిబంధనల ప్రకారం టూ వీలర్స్ హెల్మెట్, ఫోర్వీలర్స్ సీటు బెల్ట్ పెట్టుకోవాలి. ఇక ఈ ప్రక్రియ అంతా కంప్యూటర్ లో రికార్డవుతుంది. వాహనాన్ని నడిపేటప్పుడు ఎలాంటి పొరపాట్లు చేసినా కంప్యూటర్లో రికార్డవుతుంది. ఏ చిన్న మిస్టేక్ చేసినా టెస్ట్‌లో ఫెయిల్ అయినట్టు చూపిస్తుంది. ఒకవేళ పరీక్షలో ఫెయిల్ అయితే మరో నెల పాటు శిక్షణ తీసుకుని మళ్లీ రమ్మంటారు. పూర్తిగా కంప్యూటరీకరణ కావటం వల్ల ఇక్కడ అధికారులను, సిబ్బందిని మేనేజ్ చేసేందుకు ఏమాత్రం అవకాశం ఉండదని అధికారులు చెప్తున్నారు. బ్రోకర్లకు కూడా ఎలాంటి అవకాశం ఉండదని చెప్తున్నారు. దీంతో.. అడ్డదారుల్లో లైసెన్స్ పొందటం కష్టమే..!