సీఎం రేవంత్ సినీ పరిశ్రమపై పగబట్టిండు : బండి సంజయ్

సీఎం రేవంత్ సినీ పరిశ్రమపై పగబట్టినట్లుగా వ్యవహరిస్తున్నారని కేంద్రమంత్రి బండి సంజయ్ ఆగ్రహం వ్యక్తం చేశారు. ‘అల్లు అర్జున్‌ వ్యక్తిత్వ హననం చేసేలా రేవంత్ వ్యాఖ్యానించారు.

సీఎం రేవంత్ సినీ పరిశ్రమపై పగబట్టినట్లుగా వ్యవహరిస్తున్నారని కేంద్రమంత్రి బండి సంజయ్ ఆగ్రహం వ్యక్తం చేశారు. ‘అల్లు అర్జున్‌ వ్యక్తిత్వ హననం చేసేలా రేవంత్ వ్యాఖ్యానించారు. ముగిసిన సమస్యపై అసెంబ్లీలో ఎంఐఎం సభ్యుడితో ప్రశ్న అడిగించారు. సినిమా తరహా కథ అల్లి మళ్లీ సమస్య సృష్టించారు. ఇది ప్రణాళిక ప్రకారం అసెంబ్లీ వేదికగా సినీ ఇండస్ట్రీని దెబ్బతీసే కుట్ర. రేవంత్ కక్ష సాధింపు చర్యలు వీడాలి’ అని సూచించారు.

గతంలో బీఆర్ఎస్ పార్టీను ఎంఐఎం నిండా ముంచిందన్న సంజయ్.. ఎంఐఎంను నమ్మితే కాంగ్రెస్ పార్టీకి బీఆర్ఎస్ గతే పడుతుందని ఎద్దేవా చేశారు. కలుషిత ఆహారం తిని గురుకుల విద్యార్థులు చనిపోతున్నారన్న సంజయ్ … వారి కుటుంబాలను సీఎం ఏనాడైనా పరామర్శించారా? అని నిలదీశారు. ఆ మరణాలకు మీరు బాధ్యత వహించారా? అని ప్రశ్నించారు. ఇందులో మీకో న్యాయం.. ఇతరులకు మరో న్యాయమా? అని అడిగారు సంజయ్. ఇకనైనా రేవంత్ కక్ష సాధింపు చర్యలు మానుకోవాలని హితువు పలికారు.