తీన్మార్​ మల్లన్నకు కేటీఆర్​ మద్దతు

మల్లన్నకు కేటీఆర్​ మద్దతు

పల్లవి, వెబ్​ డెస్క్: ఒకప్పుడు బీఆర్​ఎస్​ పార్టీపై, కేసీఆర్​ ప్రభుత్వంపై యుద్ధం చేసిన తీన్మార్​ మల్లన్నకు.. ఇప్పుడు ఆ పార్టీ పరోక్షంగా మద్దతు ఇస్తున్నది. ఆ పార్టీ అధినేతతో సన్నిహితంగా ఉన్న వ్యక్తులు ఇప్పుడు తీన్మార్​ మల్లన్న పక్కన కనిపిస్తున్నారు. మల్లన్నకు జరిగిన అన్యాయంపై బీఆర్​ఎస్​ పార్టీ వర్కింగ్​ ప్రెసిడెంట్​ మాట్లాడుతున్నారు. బీసీ కులగణనకు సంబంధించిన రిపోర్టును చించి వేశారన్న కారణంతో కాంగ్రెస్​ పార్టీ ఎమ్మెల్సీ తీన్మార్​ మల్లన్నను సస్పెండ్​ చేసింది. దీనిపై తీన్మార్​ మల్లన్న ప్రెస్​ క్లబ్​ లో మీడియాతో మాట్లాడుతూ.. సస్పెండ్​ చేసినా, తాను బీసీల హక్కుల కోసం పోరాడుతూనే ఉంటానని తేల్చి చెప్పారు. అయితే బీసీల కులగణన సర్వే సరిగా జరగలేదని, కేసీఆర్​ హయాంలో చేసిన సమగ్ర కుటుంబ సర్వే బాగా జరిగిందని తీన్మార్​ మల్లన్న ఎప్పుడైతే చెబుతూ వస్తున్నారో.. బీఆర్​ఎస్​ నుంచి కూడా అదే స్థాయిలో మల్లన్నకు మద్దతు లభిస్తున్నది.

ఇందుకు తాజా ఘటనలే ఉదాహరణలు. కేసీఆర్​ పీఆర్వోగా పనిచేసిన ఘటిక విజయ్ కుమార్ ఇటీవల తీన్మార్​ మల్లన్నతో కలిసి సోమాజిగూడ ప్రెస్​ క్లబ్​ లో ప్రెస్​ మీట్​ పెట్టారు. కేసీఆర్ కు అత్యంత సన్నిహితుడిగా ఉన్న విజయకుమార్​ ను తీన్మార్​ మల్లన్న పక్కన చూసి అందరూ ఆశ్చర్యపోయారు. ఘటిక విజయ్​ కుమార్​ మల్లన్న తరఫున మాట్లాడుతూ.. ప్రభుత్వ విధానాలను ప్రశ్నిస్తే​ పార్టీ వ్యతిరేక కార్యక్రమం ఎలా అవుతుందో చెప్పాలని డిమాండ్​ చేశారు.

తీన్మార్​ మల్లన్న బీఆర్​ఎస్​ మధ్య పచ్చగడ్డ వస్తే భగ్గుమనేంతగా విభేదాలు ఉన్నప్పటికీ.. బీసీ కులగణన విషయంలో అనేక సార్లు తీన్మార్​ మల్లన్న కేసీఆర్​ సర్వే తీరును పొగిడారు. అలాగే బీఆర్​ఎస్​ వర్కింగ్​ ప్రెసిడెంట్​ ఇవాళ అసెంబ్లీ మీడియా పాయింట్​ వద్ద మాట్లాడుతూ.. బీసీ కులగణన సర్వేను ప్రశ్నిస్తే ఎమ్మెల్సీని పార్టీ నుంచి ఎలా సస్పెండ్​ చేస్తారు? అంటూ కాంగ్రెస్​ ప్రభుత్వాన్ని, సీఎం రేవంత్​ ను నిలదీశారు.